Geng Quarong, ɗan ƙasar China da ake zargi da kashe budurwarsa mai shekaru 23, UmmuKulsum Sani a Kano, ya musanta aikata laifin.
A ranar Alhamis ne dai aka gurfanar da wanda ake zargin a gaban babbar kotun jihar Kano.
An gurfanar da shi ne a ƙarƙashin sashe na 221 na dokokin penal code, da hukuncin kisa.
Sai dai wanda ake zargin ya musanta abin da kotu take tuhumarsa akai.
A dalilin haka mai shari’a Sanusi Ado Ma’aji ya ɗage sauraron ƙarar zuwa ranar 16,17 da 18 ga watan Nuwamba domin sauraren ƙarar.
Sa'annan ya ba da umarnin a ci gaba da tsare wanda ake ƙara a gidan gyaran hali.
Wasu ƴan kungiyar Jan Bulo da ke Kano ne suka daƙile Quanrong bayan ganin shi a ɗakin marigayiyar ɗauke da wuƙa da jini kimanin wata ɗaya da ya wuce.
0 Tsokaci