Gwamnatin Tarayya Ta Kashe N3.83trn Akan Bashi a Cikin Watanni 15 – DMO

Ofishin kula da basussuka (DMO) ya bayyana cewa gwamnatin tarayya ta kashe Naira tiriliyan 3.83 wajen biyan basussuka cikin watanni goma sha biyar tare da lura da cewa kudaden shigar da kasar ke samu ya gaza hakan.

Darakta-Janar, Patience Oniha ce ta bayyana hakan ga Kamfanin Dillancin Labarai na Najeriya (NAN) a wata hira.

Oniha ta ce abin takaici ne yadda gwamnatin tarayya ta kashe kudade wajen biyan basussuka a cikin watanni hudun farko na shekarar 2022 fiye da abin da ta samu a wannan lokacin.

Ta bayyana cewa biyan bashin kasar ya karu da kashi 109 cikin 100 a tsakanin watan Disamba na shekarar 2021 zuwa Maris 2022 inda ta ce ya karu daga Naira biliyan 429 zuwa Naira biliyan 896.

A cewar ta: “Nawa ne kudin shiga Najeriya ke samarwa? Alkaluma sun nuna cewa idan aka kwatanta da sauran kasashe, kudaden shigar Najeriya ba su da yawa.

"Bayanin Bankin Duniya kan tattalin arzikin duniya na 2020 ya nuna cewa Najeriya mai samun kudaden shiga zuwa kashi 6.3 cikin 100 na GDP ta kasance a matsayi na 194 cikin 196 da aka bincika."

Ta ci gaba da cewa: “DMO ta sha nanata bukatar bunkasa kudaden shiga sosai domin bashi ya dore.

“Yana da kyau kafafen yada labarai da manazarta al’umma su fara mai da hankali kan samar da kudaden shiga na Najeriya.

“Kudaden shiga ita ce hanyar da za a bi kuma ta haka ne kasashe ke bunkasa tare da yin amfani da rance don kara kudaden shiga akai-akai.

“Najeriya ta kwashe shekaru da dama tana fama da gibin kasafin kudi; lokaci ya yi da za a canza zuwa daidaiton kasafin kuɗi har ma da rarar kasafin kuɗi."