Manoman Shinkafa A Taraba Sun Koka Kan Yadda Ambaliyar Ruwa Ya Lalata Musu Gonar Shinkafa

Ambaliyar ruwa ya lalata wasu gonakin shinkafa a kananan hukumomi biyar na jihar Taraba da ke da nisan sama da kilomita 250 a kan iyakokin jihohin Adamawa da Benue.

Kananan hukumomin da abin ya shafa sun hada da Karim Lamido, Ardo Kola, Lau, Gassol da Ibbi.

Wani manomi a garin Kwatan Nanido mai suna Adamu Saidu ya shaida cewa ya shuka buhunan shinkafa buhu bakwai kuma yana sa ran zai girbi fiye da 1,000 na shinkafa amma sama da kashi 85 na gonarsa ambaliyar ruwa ta lalata.

Wata mai yin noma  mai suna Rita John, ta ce ta karbi rancen Naira 400,000 daga daya daga cikin kamfanonin sarrafa shinkafa don shuka shinkafa kuma tana fatan za ta biya da shinkafa a lokacin girbi amma fatanta na biyan bashin da kuma samun riba ya ci tura sakamakon ambaliyar ruwa.Ta yi kira ga gwamnatin tarayya da na jihar Taraba da su taimaka wa manoman da ambaliyar ruwa ta shafa a jihar.

Shugaban garin Mutumbiyu, Mai shari’a Sani Muhammed (rtd) ya ce wannan lamari ne mai ban tausayi ga manoman shinkafa a yankinsa.

Ya koka da cewa manoman da suka gudu daga can baya zuwa bakin kogi saboda ayyukansu na noma saboda hare-haren ‘yan bindiga sun yi babban rashi.

Sarkin ya bayyana cewa ambaliyar ruwa ya lalata gonakinsa guda hudu, ya kuma yi kira ga gwamnati da ta taimaka wa manoman da abin ya shafa da irin shinkafa da injinan fanfon ruwa da taki domin fara noman shinkafa a lokacin noman rani domin samun sauki.

Shugaban kungiyar manoman shinkafa ta jihar Tanko Bobbi Andami, ya ce yana Abuja kuma kungiyar ta fara tattara jerin sunayen manoman da abin ya shafa da kuma barnar da aka yi a lokacin kudi.

Sai dai Sakataren Hukumar Ba da Agajin Gaggawa ta Jihar Taraba (SEMA), Mista Yusuf DanAzumi, ya ki cewa komai kan lamarin.A halin da ake ciki, gwamnatin jihar ta yi kira ga gwamnatin tarayya da hukumar raya arewa maso gabas da su taimaka wa wadanda bala’in ambaliyar ruwa ya shafa a jihar.

Kamishinan noma na jihar Taraba, Dr David Ishaya, yayin da yake tsokaci kan barnar da aka yi a gonakin shinkafa, ya ce bala’in ba za a iya kwatanta shi da na shekarar 2012 ba.

Ya kara da cewa barnar da aka yi ta yi yawa sosai kuma yana bukatar taimako daga gwamnatin tarayya da sauran hukumomi don tallafawa manoman da abin ya shafa.