Kasar Sin Ta Gina Katafaren Dakin Karatu A Birnin Tarayya Abuja

Gwamnatin kasar Sin ta jaddada kudirinta na tallafawa ci gaban ilimi a Najeriya.

Jakadan kasar Sin a Najeriya, Cui Jianchun, ya bayyana haka a lokacin kaddamar da sabuwar cibiyar Sinawa a karamar makarantar sakandire, ta unguwar Area11 da ke Abuja.

Cui, wanda ya samu wakilcin mataimakin sa,  Zhang, ya ce gwamnatin kasar Sin za ta ci gaba da ba da goyon baya ga ci gaban ilmin yara a Najeriya, domin shi ne ginshikin ci gaban zamantakewa da ci gaban kasa.

“Shekaru 10 da suka gabata, a shekarar 2012, an kaddamar da makarantun firamare hudu da kasar Sin ta taimaka musu, ciki har da na Nyanya, wanda gwamnatin kasar Sin ta gina, kuma ta ba da gudummawa ga hukumar babban birnin tarayya Abuja (FCT).

“Tun daga wannan lokacin, a kowace shekara, Ofishin Jakadancin ya na ba da tallafi ga wannan  makaranta. Yanzu haka makarantar ta zama makaranta mai inganci kuma iyaye da yawa da ke zaune a kusa da Nyanya suna son  tura ‘ya’yansu karatu zuwa wannan makarantar,” inji shi.
“Kyakkyawan alakar da ke tsakanin Ofishin Jakadancin da Hukumar Kula da Ilimi  ta FCT (UBEB) ta fara ne tun da dadewa. A shekarar 2016, bangarorin biyu sun yi nasarar gudanar da bikin al'adu.

“Dangantakar da ke tsakaninmu tana kara inganta ne a kowace shekara. A yau, a wannan taro na musamman, ba wai kawai mun shaida yadda aka kaddamar da wannan cibiya ta kasar Sin da aka inganta ba, har ma da kara karfafa dangantakarmu da ke tsakaninmu.

Ya kara da cewa, ofishin jakadancin kasar Sin zai ci gaba da ba da goyon baya ga ci gaban makarantun cikin gida, muddin muka hada kai da goyon bayan juna, za mu samar da kyakkyawan yanayi a gobe.Dokta Alhassan Sule, shugaban riko na hukumar ba da ilmi ta kasa da kasa (UBEB) na babban birnin tarayya Abuja, wanda Misis Jacqueline Amasike ta wakilta, ya ce ofishin jakadancin kasar Sin ya taka muhimmiyar rawa wajen ciyar da ilimi gaba a wannan yanki tun lokacin da aka fara aikin ilimi a yankin. da kuma dangantaka tsakanin bangarorin biyu.

Wan Lianyu, Manajan Darakta na Kamfanin Injiniya na Goma sha Takwas (EEC), kamfanin kasar Sin da ya taimaka wajen inganta wannan cibiyar, ya ce kamfaninsa ya fara aikin ne a matsayin wani bangare na kula da harkokin jama'a na kamfanoni, da bukatar karfafa mu'amalar al'adu tsakanin Sin da Najeriya.