Hatsarin mota a Kwara ya kashe mutane 30 – FRSC

Hukumar kiyaye haddura ta kasa (FRSC) a jihar Kwara ta bayyana cewa hadurran mota a jihar sun kashe mutane akalla 30.

Hakan ya fito ne daga bakin kwamandan hukumar FRSC na jihar, Frederick Ade Ogidan a yau.

Ogidan wanda ya zanta da Daily Trust ya ce hatsarin da ya afku a kan babbar hanyar Jebba/Ilorin/Ogbomoso ya faru ne sakamakon gudun wuce gona da iri.

Ya kuma kara da cewa rashin bin ka’idojin tuki da kuma na hanya ne ke kara afkuwan haduran. 

A cewar sa, “Akwai hadura guda uku daban-daban.

“Daya ya hada da mutum 4 da suka mutu, daya 9 kuma na karshe yana da mutum goma sha shida wadanda suka mutu a cikin hatsarin.

"Yawancin su hadura ne da yawa tare da na ƙarshe da ya faru a ƙarshen mako."

A yayin da yake kira ga masu ababen hawa da su yi tuki a tsanake, ya kara da cewa: “Yayin da shekarar ta kawo karshe, za ku samu karuwar ayyukan sintiri da aiwatar da ayyukan mu da kuma ayyukan ceto domin ta haka ne kadai za mu tabbatar mun isa da rai."

Daga nan ya yi kira ga masu ababen hawa musamman direbobi haya da su guji daukar fasinjoji fiye da yadda motar za ta iya dauka.

Ya kuma bukace su da su rika rike ingantaccen lasisin tuki yayin tafiye-tafiyen su.