Hukumar bayar da agajin gaggawa ta jihar Yobe (YOSEMA) ta tabbatar da karuwar adadin wadanda suka mutu sakamakon hatsarin jirgin ruwa da ya afku a karshen mako.
Hukumar ta ce akalla mutane takwas ne aka tabbatar sun mutu.
Idan dai za a iya tunawa, AllNews ta ruwaito cewa hatsarin ya rutsa da wasu kwale-kwale guda biyu a karamar hukumar Tarmuwa ta jihar wanda ya yi sanadiyar mutuwar mutane biyu yayin da wasu da dama suka bace.
A cewar wata sanarwa da hukumar ta fitar: “Bayan mummunan abun da ya faru na hatsarin Kwale-kwale da ya yi sanadin asarar rayuka da sauran wadanda abin ya shafa suka samu raunuka.
“Kamar yadda mai girma Gwamnan Jihar Yobe, Hon. Mai Mala Buni ya ba da umarni, YOSEMA ta fara aikin bincike da ceto ta hanyar amfani da masana sihirin ruwa na cikin gida da kayayyakin da ake da su don ceto wadanda ake zargin sun bace.
“Yayin da muke mika ta’aziyya ga iyalan da abin ya shafa tare da yi wa wadanda suka jikkata fatan samun sauki cikin gaggawa, YOSEMA ta yi kira ga jama’a da su yi taka-tsan-tsan tare da kauce wa bin hanyar.
“Gwamnatin jihar YOBE tare da hadin gwiwar hukumomin tsaro da masu ruwa da tsaki suna aiki don samar da ingantattun hanyoyin aminci ga al’ummomin da abin ya shafa don samun amintaccen tafiye-tafiye da shiga tsakanin kauyukan da ke makwabtaka da su.
"Za a samar wa al'ummomin da abin ya shafa mahimman tallafin ceton rayuwa daidai da haka."
Sakataren zartarwa na hukumar, Mohammed Goje ya kuma yi magana a wata hira da Premium Times cewa, “Yawan gawarwakin da aka ceto sun kai 8 amma har yanzu masana sihirin ruwa na cikin gida na ci gaba da aiki don zakulo wasu gawarwakin daga hatsarin.
A cewar sa, yanzu haka wasu mutane takwas suna kwance a babban asibitin Dapchi.
“Har ila yau akwai mutane takwas da suka samu raunuka kuma suna kwance a babban asibitin Dapchi.
“Dole ne in gaya muku cewa dukkan su suna samun sauki.
"Da mun kai su Asibitin Koyarwa da ke Damaturu amma saboda mawuyacin halin da ake ciki yana da matukar wahala, don haka gara a kwantar da su a asibiti mafi kusa."
0 Tsokaci