Sojoji Sun Ceto Basaraken Filato Da Direban Sa Daga Masu Garkuwa Da Mutane

Dakarun rundunar ‘Operation Safe Haven’ a jihar Filato sun ceto sarkin kauyen Pinau, Dadda’u Ahmad da ke karamar hukumar Wase a jihar.

Kakakin rundunar, Ishaku Takwa ne ya bayyana hakan.

A cewar Takwa, tuni aka hada basaraken da iyalansa.

Ku tuna cewa an sace sarkin ne tare da direbans a da sanyin safiyar Talata.

Wani mazaunin garin, Ubale Pinau ya shaida wa Daily Nigerian cewa sojojin sun ceto mutanen ne a lokacin da suka samu labarin sace su.

A yayin aikin, babura uku da bindigogi biyu ne aka kwato. 

Wani dan banga a unguwar mai suna Nazifi Abubakar ya ce an kai harin ne tare da mutanen su.

A cewar sa: “Ina tare da sojoji a yayin aikin ceton.

“Sojoji da wasu ’yan bangan unguwar ne suka dawo da basaraken kauyen, wadanda suka bi sahun masu garkuwa da mutanen zuwa daji.

“Kowa yana farin ciki a ƙauyen yanzu. 

"An yi musayar wuta tsakanin sojoji da maharan kafin a ceto wadanda abin ya shafa."

Ya Kuma yaba wa dakarun yayin da yake addu’ar Allah ya kara musu nasara.