Rikicin PDP: Wike Ba Zai Iya Hana Mutanen Ribas Zaben Atiku Ba, Inji Lamido

Tsohon gwamnan jihar Jigawa, Sule Lamido, ya kare jam'iyyar PDP, da dan takararta na shugaban kasa, Atiku Abubakar, kan alakar sa da gwamnan jihar Ribas, Nyesom Wike.

In zaku iya tunawa Mista Wike yana takun-saka da Mista Atiku bisa zargin kin zaban shi a matsayin abokin takararsa.

Da yake magana a wata hira da aka yi da shi a gidan talabijin na Channels TV a shirin Siyasa a Yau, wanda Jaridar Daily Nigerian ta ruwaito a ranar Talata, Mista Lamido ya ce Atiku, ko wani dan PDP ba su yi wa Mista Wike laifi ba, kuma gwamnan ba zai iya hana mutanen jiharsa su zabi dan takarar shugaban kasa ba.

A cewarsa, gwamnan jihar Ribas ya kamata ne kawai ya fusata da babban taron jam’iyyar PDP wanda ya samar da Mista Atiku a matsayin dan takararta.

“Wannan jam’iyya kamar kowace jam’iyya a Nijeriya tana da tsarin mulkinta, ka’idoji da tsare-tsare kuma idan aka duba tsarin da PDP ke yi tun daga matsayin mai ba da shawara har zuwa shugaban majalisar wakilai, Gwamna, Majalisar Dokoki ta kasa, akwai dokoki da ka'idoji;  kuma majalisa ce ke samar da wadannan jami’ai a kowane mataki.

“Mutane sun fafata a zaben kansila;  wasu sun yi nasara, wasu sun yi asara,  Haka kuma a matsayin shugaba da gwamna.  

"To mene ne babban abu game da Wike?  A gare ni wa ya yi wa Wike laifi?  Wa ya bata masa rai?  Babu batun nan.

“Akwai wani babban taron jam’iyyar da aka yi a Abuja inda Wike ya shaida ya ce abin gaskiya ne; To mene ne babban abu a nan?  Wanene ya yi laifi a can?  Ina so in sani da farko saboda me yasa Wike ke batun a nan?

“Taron ya fitar da dan takara wanda ya lashe zaben fidda gwani.  Idan akwai laifi taron ne ya bata wa Wike rai, ba kuma shugaban jam’iyyar ba.”

"Wike mutum ne.  Ba na jin saboda shi gwamna ne ke da rinjaye a Ribas.  

"Mutanen Rivers suna cikin PDP dama tun asali, tun a 1999. Ba zai iya zama sarkinsu ba domin shi ne gwamna;  ba zai  yiyu ba," in ji shi.