2023: Korar Ayu Zai Ƙara Dagula Rikicin PDP, Cewar Kakakin Atiku

Kakakin yaƙin neman zaben shugaban kasa na jam’iyyar PDP, Charles Aniagwu, ya ce korar shugaban jam’iyyar na kasa, Iyorchia Ayu, zai kara dagula rikicin jam’iyyar.

Mista Aniagwu ya bayyana hakan ne a cikin wani shirin Talabijin a garin Asaba yayin da yake tabbatar da dalilin da ya sa jam’iyyar PDP ke tsara wasu hanyoyin da za a magance rikicin da ake fama da shi.

Ya ce korar shugaban jam’iyyar na kasa zai kara haifar da rikici a jam’iyyar wanda zai haifar da manyan matsaloli fiye da yadda jam’iyyar ke fuskanta a halin yanzu.

Kamar yadda jaridar Daily Nigerian ta ruwaito, ya ce shawarar cewa dole ne shugaban jam'iyar ya sauka daga mukaminsa, lamarin ya jawo wasu abubuwa biyo bayan kuri'ar amincewa da kwamitin zartaswa na kasa ya yi.

“Mutane na iya yin kuskuren fassara shi da cewa suna kiran saɓo na wasu masu ruwa da tsaki amma hakan ya yi nisa domin shugabancin jam’iyyar ya nazarci al’amuran ne ta hanyar kundin tsarin mulkin jam’iyyar da aka yi wa gyara a 2017.

“Idan aka duba wannan kundin tsarin mulkin, akwai manyan jami’ai da ake kira Kwamitin Aiki na kasa wanda Shugaban jam'iya ya jagoranta.

"A tsarin mukami, mataimakin shugaban kasa, wanda shi ma dole ne ya fito daga shiyya daya da shugaban kasa.

“Na uku a jerin sunayen shi ne sakataren kasa;  Idan aka dubi wadannan mukamai, Shugaban jam'iya ya fito daga Arewa, na biyu kuma daga Arewa ne saboda tanadin kundin tsarin mulkin jam’iyyar.

“A cikin sashe na 45 na kundin tsarin mulkin jam’iyyar, idan aka tsige shugaban jam’iyyar na kasa ko kuma ya sauka daga mukaminsa, mataimakin shugaban jam’iyyar na kasa zai karbi ragamar mulki kuma ya yi aiki a wannan matsayi har sai lokacin da jam’iyyar za ta iya shirya wani zabe.

“Bayan haka, jam’iyyar za ta kira taron majalisar zartarwa inda za ta yanke shawarar yadda za a sake daidaita tsarin jam’iyyar,” in ji shi.