Fashewar Tankar Mai: Mutum 2 Sun Mutu, Motoci 12 Sun Kone A Hanyar Legas-Abeokuta

Rahotanni sun ce mutane biyu sun kone kurmus yayin da wasu uku suka samu raunuka sakamakon fashewar wata tankar mai dauke da man fetur a unguwar Ilo Awela, Sango Tollgate, kan hanyar Legas zuwa Abeokuta.

Akalla motoci 12 kuma an ce sun kone kurmus yayin fashewar da ta afku a safiyar Alhamis.

Rahotanni sun bayyyana cewa tankar na hawa kan  tudun Ilo Awela da ke kusa da babban titin a lokacin da ta fado ta kama da wuta.

Kakakin hukumar kiyaye hadurra ta kasa (FRSC) reshen jihar Ogun, Florence Okpe, ta tabbatar wa manema labarai faruwar lamarin a Abeokuta.

Ta bayyana cewa, abin da ake zargin ya haddasa hatsarin matsala ne na injin mota, inda ta ce a lokacin da motar dakon man ke hawan, sai motar ta birkice ta kuma yi karo da juna, lamarin da ya sa man  ya zube kuma ya kai ga tashin gobara.

Ta ce, “Hukumar FRSC ta gudanar da aikin ceto da misalin karfe 1:30 na safiyar ranar Alhamis da ta hada da wata tanka mai dauke da PMS (man fetur) yayin da ta hau gangaren Ilo Awela da ke kusa da sashin Abeokuta-Lagos na babban titin. Ya fadi ya hau cikin harshen wuta.

Ta ƙara da cewa an kira  jami’an hukumar kashe gobarar ne kuma sun killace yankin domin hana afkuwar hatsarin a karo na biyu.