2023: Babban Sufeton 'Yan Sanda Ya Gana Da Kwamandojin Tsaro Gabanin Yakin Neman Zabe

Gabanin fara yakin neman zaben 2023, babban sufeton ‘yan sandan Najeriya Usman Baba, ya sanya manyan kwamandojin ‘yan sanda cikin shirin ko ta kwana.

A jiya ne dai babban Sufeton ya gudanar da wani muhimmin taro da mataimakin sufeto-Janar na ‘yan sanda da mataimakan sufeto-janar na ‘yan sanda da kuma kwamishinonin ‘yan sanda na jihohi 36 da kuma babban birnin tarayya Abuja.

Ya ce makasudin taron shi ne domin duba shirye-shiryen siyasa dake gabatowa kamar yadda hukumar zabe mai zaman kanta ta kasa ta tanada, da kuma tsara kwararan hanyoyi don tabbatar da gudanar da zabe cikin lumana a zabuka mai zuwa a 2023.

Ya kuma bukaci kafafen yada labarai da su fifita sha’anin tsaron kasa sama da sauran ra’ayoyi tare da kaucewa yada labaran da ka iya haifar da tashin hankali da tashin hankali a fagen siyasa yayin da aka fara yakin neman zabe.

Baba ya kuma bukaci DIGs, AIGs da CPs da su kara kaimi domin mamaye wuraren jama’a don tabbatar da cewa masu aikata laifuka ba su yi amfani da damar siyasa wajen bayyana mugun nufi ba.

Yayin da ya saura ƙasa da mako biyu a fara yaƙin neman zaɓe a Najeriya, hukumomi na ta shirye shiryen tunkarar kakar yakin neman zaben ta hanyar tabbatar da ƴan siyasa da masu ruwa da tsaki basu haddasa fituntinu ba.