Hukumar Hisbah Ta Kama Kwalaben Giya 5,800 A Kano

Hukumar Hisbah a jihar Kano ta ce ta kama wasu motoci uku makare da kwalaben giya.

 

Babban Kwamandan Hukumar Hisbah, Haruna Ibn-Sina shi ne ya bayyana hakan a ranar Litinin a garin Kano yayin da yake duba motocin da aka kama a ofishin na Hisbah.

 

Kakakin hukumar, Lawan Fagge, ya bayyana cewa an kama motocin ne a ranar Lahadi.

 

An kama Mota kirar Mercedes Benz, mai dauke da kwalaben giya 1,800; sai karamar motar Sienna, dauke da kwalaben giya 3,000 sai kuma motar Golf Volkswagen dauke da kwalaben giya 1,000.

 

Fagge ya bayyana cewa, Ibn-Sina ya yabawa sashin hana shan maye da suka damke motocin bisa kokarinsu na ganin an hana shan barasa da muggan kwayoyi a jihar.

 

Shugaban sashin hana shan kaya maye, Jamilu Hassan-Yakasai, ya bayyana cewa an kama motoci guda uku ne a lokacin da suke kokarin shigar da barasa cikin garin Kano.

 

Shugaban Hukumar ya tabbatar da cewa hukumar ba za ta yi kasa a gwiwa ba wajen kawo sauyin kauda duk wani nau’i na miyagun dabi’u, musamman masu safarar miyagun kwayoyi da kuma ta’ammali da miyagun kwayoyi.