Shugaba Muhammadu Buhari yanzu haka yana Landan, inda zai halarci taron Ilimi na Duniya kan samar da kudaden kawancen harkar ilimi na duniya (GPE) daga shekarar 2021 zuwa 2025.
A cewar rahoto, jirgin shugaban ya isa Filin jirgin saman Stansted ne a garin London da misalin karfe 11:20 na dare.
A wata sanarwa da mai magana da yawun shugaban, Femi Adesina ya gabatar a baya cewa, Firayim Ministan Burtaniya, Boris Johnson, da Shugaban kasan Kenya, Uhuru Kenyatta ne za su dauki shugabanci taron.
A cewar sa, taron zai hada Shuwagabannin kasashe da dama, gami da masu ruwa da tsaki da shugabannin matasa, da kuma samar da wata kafa ga abokan hulda da za su tsara hanyar da za a bi wajen sauya tsarin ilimi a cikin kasashen ta hanyar musayar hanyoyi masu inganci.
“Hakanan zai ba da dama ga shuwagabanni su yi alkawura na shekaru 5 don tallafawa aikin GPE da kuma taimakawa sauya tsarin ilimi har zuwa kasashe da yankuna 90.
"Tattaunawa a Babban Taron zai mai da hankali ne kan: 'karfin Ilimi –Taunawa tsakanin Zakarun Duniya'; 'inganta Ilimi ga' Yan mata '; 'Kudaden Tallafawa'; da 'Me ake ciki Yanzu? Abubuwan fifiko don Canza Ilimi a Shekaru Biyar masu zuwa ', da sauransu," kamar yadda Adesina ya bayyana.
Ya ce shugaban na Najeriya zai kuma yi ganawar hadin gwiwa da Firayim Ministan Burtaniya bayan taron.
Bayan kammala taron, Adesina ya ce, Buhari zai kwashe wasu kwanaki don duba lafiyar sa.
Mai magana da yawun shugaban ya ce "zai dawo a cikin mako na biyu da Kama watan Agustan 2021."
0 Tsokaci