Almubazzaranci Ne Gina Cibiyar Taro Ta N5bn a Gombe, Cewar Inuwa Yahaya

Gwamnan Jihar Gombe, Muhammad Inuwa Yahaya ya caccaki tsohuwar gwamnatin jihar akan gina cibiyar taro ta N5bn.

Yahaya ya ce almubazzaranci ne da dukiyar jama'a ganin cewa ba'a amfani da cibiyar.

Hakan ya zo ne cikin jawabin sa a wani taro da mazauna jihar kan shirye-shiryen kasafin kudin shekarar 2022.

Ya kara da cewa aikin da tsohuwar gwamnatin ta gudanar bata cancanci a kashe wannan makudan kudaden ba.

Ya ce jihar ba ta bukatar wata cibiyar taro yayin da take da Jewel Hall, wanda a halin yanzu yana amfani iri daya tun 1972.

Gwamnan ya bayyana cewa har yanzu cibiyar na bukatan naira miliyan 500 don sayan kujeru da sauran kayayyaki da zasu sa ta fara aiki.